მე გრინჩიანელი ვარ!

აბა ახალი წელი მოდისო და განწყობა გვჭირდებაო.ყველაფერი უნდა გავანათოთ საშობაო ნათურებით და აუცილებლად უნდა მოთოვოსო,სახლი უნდა მოვრთოთო და ბუხარზე წითელი წინდები ჩამოვკიდოთო,ზედ სახელები მივაწეროთ სანტა ნიკს,რომ არ აერიოს ჩვენი საჩუქრებიო.. ჩემთანაც თითქმის ასე ხდება,ხოლმე უბრალოდ წინდას უკვე დიდი ხანია აღარ ვკიდებ ბუხარზე სანტას საჩუქრის მოლოდინში.. რატომ? როცა ჯერ კიდევ ბავშვი ვარ? მოდით მაშინ გიამბოთ..

სამი წლის რომ ვიყავი ოჯახში მითხრეს,რომ ღამით,როცა მე დავიძინებდი ჩემს საყვარელ ნაძვისხესთან,სანტა ნიკი აუცილებლად დამიტოვებდა საჩუქარს,რომლის ნახვასაც მე დილით შევძლებდი.მაშინ დედას ვთხოვე ღამით კარი არ ჩაეკეტა,იმიტომ რომ ჩვენს სახლს ბუხარი არ ჰქონდა და სანტა ხომ უნდა შემოსულიყო საიდანღაც.მაშინ მამამ მითხრა,რომ სანტას ყველა სახლის გასაღები ჰქონდა და რომ,არც ჩვენი იყო გამონაკლისი.. მე კიდევ მახსოვს პირველად იმ წელს შემორჩა ჩემს მეხსიერებას საზიზღარი გრინჩი და თავს ვიიმედებდი,რომ ამ შემთხვევაში ჩემი ნაძვისხეც და საჩუქრებიც მას გადაურჩებოდა..

რა არის გასაკვირი იმაში,რომ იმ ღამით ვერა და ვერ დავიძინე.მეჩვენებოდა დიდი,თეთრწვერა და ღიპიანი ბაბუა,როგორ იპარებოდა ჩემს სახლში და ნაძვის ხის ქვეშ საჩუქრებს ალაგებდა.იმ ღამით საშინელი ქარი ქროდა,ვფიქრობდი სანტას რამე არ მოუვიდეს და საჩუქარი სულაც არ მინდა-მეთქი..

თუმცა,დილით საჩუქარი ნაძვის ხის ქვეშ დამხვდა.დამხვდა,მაგრამ ამ საჩუქარს დედას და მამას სურნელი ასდიოდა.პატარა შკატულკა იყო,მოცეკვავე ბალერინათი,რომელიც დღემდე ჩემს საყვარელ მუსიკას უკრავდა.. მაგრამ ეს სწორედ ის შკატულკა იყო,რომელიც საგულდაგულოდ დამალული,დედას ბრჭყვიალა ნივთების შესანახ თაროში ვიპოვე წინა ღამით,სულ ეს იყო..

არაფერი მითქვას,საჩუქარიც დიდი სიხარულით მივიღე,მაგრამ იმ დღის შემდეგ ყოველ ახალ წელს სახლში გრინჩს ველი ხოლმე,ჩემს საყვარელ გრინჩს,რომელსაც საკუთარი ხელით გავატანდი საჩუქრებს,ოღონდ მცოდნოდა რომ ბედნიერი იქნებოდა..

სანტა ნიკი და მე კიდევ სწორედ ამ დღის შემდეგ დავშორდით ერთმანეთს..

ქვეყნად ბევრი სანტა მყავს,რომლებიც საჩუქრებს ჩემთვის არ იშურებენ,მაგრამ  მას შემდეგ ვოცნებობ ვიყო სინდი,რომელმაც გრინჩს შობა შეაყვარა.. და ყველას ერთად გავაგებინოთ,რომ მთავარი ახალ წელს ეს ბუთხუზა ბაბუა და მისი ჩუმად ნაჩუქარი საჩუქრები კი არა გაჩუქებული სითბოა,რომელსაც ყველა გრინჩიანელს და არ მხოლოდ მათ დიდი სიხარულით გჩუქნით!

და თქვენ ვის მხარეს ხართ გრინჩის თუ სანტასი?

ბედნიერ შობა-ახალ წელს გისურვებთ,მხიარულებით და საჩუქრებით სავსეს ნაძვის ხის ქვეშ,იქნებ ცოტა გრინჩთანაც გამატანოთ.. )